عيد سعيد
شعر / محمد الشرقاوى
كل عام وانتم أحبة
والقلوب بتفيض محبة
والزهور حاضنة الأيادي
والأماني لسه شابة
عيد سعيد يا ولاد بلادي
فرحة جاية بشوق تنادي
للحبايب للقرايب
واللي حبه في عينه بادي
عيد سعيد يا مصر قولي
بالعدالة ف يوم تطولي
نجم ساكن في السحاب
والفرح دايما تنولي
مد إيدك يا أمير
كل عام وانتم بخير
كل عام والحلم صابح
يرسم الأيام عبير
مدي إيدك يا ابتسام
نرسم الأيام سلام
أرضنا الغالية علينا
تمشي دايما للأمام
ياللا نرسم أحلي فرحة
زي شجرة كبيرة طارحة
تحضن القلب اللي شارد
والقلوب تصبح مسامحة
